J-Blogg

Berre nokre dagar att til premiere...

2010-03-02T23:23:00.000+01:00

Søndag var eg på øving med bandet som skal spele på kabareten til Åmdalskoret berre damer. Det er tre flinke karar vi har fått med oss, alle har vore eller er studentar ved Høgskulen i Volda. På piano: Helge Berg, på bass: Cornelius Østlie, på slagverk: Mattis Moviken.

Nedanfor er nokre bilete frå øving med damekoret. Det er ein spent gjeng som skal levere eit spenstig show på førstkomande laurdag! Vel verdt å få med seg!! :-)

Oppstilt og klare til innsats på siste øving før premiera!

Grete Rem - skal tru kva dette er for eit innslag... ;-)

Hmm, kva er det alle ser på her?

Då vil eg til slutt her berre få ynskje DEG hjarteleg velkomen til vår kabaret.

Laurdag 6.mars

(Premiere - med dans etterpå: The Red Roosters spelar)

Torsdag 11.mars

Fredag 12.mars

ØRSTA KULTURHUS - kinosalen.

Billettar får du kjøpt på kulturhuset, eller på nettet: www.orsta.kulturhus.no

Volda mannskor øver til julecd-prosjekt

2010-02-22T01:10:00.002+01:00

Denne helga har Volda mannskor vore på nedre bygg på Volda vidaregåande skule. Der har det vore to innhaldsrike dagar med julesongar og andre mannskorperler. Vi held på å førebu innsynging av julecd, ein cd som skal bli å få tak i før jul i år.

Mannskoret er ein kjekk gjeng der latteren og kommentarane sit laust. Stemninga i helga har vore veldig fin, og konsentrasjonen absolutt til stades. Det let så vakkert når dei legg sjela si i det dei syng, og det har mannskoret verkeleg gjort desse dagane. Eg har fine opptak frå helga, og skjønar godt kvifor mannskorsong er så populært!

Her kjem nokre bilete eg tok, "ekje dei stilige kara?" (fritt henta frå Ove Klepp sin "Mannskorsong")

Som de ser er det konsentrerte karar på øving, og det gav gode resultat!

Olav og Stig hadde eit underhaldningsinnslag som vart godt motteke i koret, god stemning vart det!

Jarle tok med kake til gjengen - eg måtte skunde meg å ta bilete! Vips var kaka vekk! :-)

Og med det sender eg ei helsing til VOLDA MANNSKOR og takkar for ei fin øvingshelg!

Øvingshelg med Åmdalskoret berre damer og band

2010-02-07T19:12:00.000+01:00

Du og du kor artig det er med kor!! No sit eg i godstolen min og høyrer på opptak frå

øvingshelga vi har hatt. Det er forresten eit veldig nyttig verktøy å ha - ein Edirol opptakar som tek opp veldig bra lyd på ein enkel måte. No kan eg sitte i ro og fred og analysere, notere, flire litt, smile mykje og

glede meg til vi skal få syne fram vår nye kabaret.

Åmdalskoret berre damer er ein kreativ gjeng, og kabareten vi no har laga er nr. 4 sidan vi vart damekor. Denne gongen har vi leita fram mange fine, kule, artige og spreke songar frå 1930 og fram til i dag.

Til våre tre første kabaretar nytta vi innspelt akkompagnement. Det har fungert veldig bra, men i år fekk vi lyst til å prøve noko nytt. Derfor har vi fått med oss dyktige musikarar som vil vere vårt eige husorkester på førestillingane. Helge Berg på tangentar, Mattis Moviken på trommer og Kjell Ove Aaberg på bassgitar.

Vi har mykje spennande å by på, så vi håper at vi får fulle hus i mars når kabareten vert sett opp på

Ørsta kulturhus.

PS! Billettane vert snart lagt ut for salg på Ørsta kulturhus sine nettsider.

Denne fine plakaten er det Lise Sande som har laga, og den vert å sjå rundt om kring i distriktet framover!

Like fargerik som plakaten er blir damekoret med sine flotte kostymer.

Så folkens, ta turen til Ørsta kulturhus ein (eller fleire...) av desse kveldane:

Laurdag 6.mars *** Torsdag 11.mars *** Fredag 12. mars

Stem team Simone

2009-11-26T23:01:00.000+01:00

Det store korslaget skal starte på igjen etter nyttår, og det vert spennande!
Frå Volda skal Simone frå D'Sound stille med eit Sunnmørskor, og det lovar veldig bra. Eg deltok sjølv på audition, men vart dessverre ikkje plukka ut til å vere med. Men det var ei fin erfaring å ta med seg, eg er fornøgd med at eg våga å prøve...
Koret består av dyktige, strålande songarar. Eg håpar at dei vinn heile sulamitten, Sunnmøre er eit fantastisk kordistrikt!

Lykke til Team Simone!

Fredagskveld

2009-10-30T23:54:00.000+01:00

Det er fint å sitte i vår gode, mjuke sofa og slappe av etter ei intens veke. Junior har besøk av ein kompis og min kjære er på jobb. Vi har kosa oss med taco, gullrekka på NRK og no er det senkveld. Alt i alt fleire gode grunnar til å bli verandes heime ein fredagskveld!

På jobb deltek eg på eit kurs for tida, der blogging er sentralt. Om du vil sjå min andre blogg kan du finne den her.

På lesefronten er det krim som står i fokus for tida. Eg er med i ein lesesirkel (og klubb) der vi no les ein gammal Anne Holt-krim. "Demonens død" handlar om eit drap på ei barneheimsbestyrarinne, og er ganske bra lesestoff. Dette er første Holt-boka eg les, eg hadde nok ikkje kome på å lese noko av ho av meg sjølv. Bøkene hennar har aldri vekt noko interesse, men eg må innrømme at boka ikkje er så verst! No er eg ikkje heilt ferdig enno, det står att ca 100 sider. Heldigvis har eg god tid, vi har ikkje klubbkveld før på onsdag...

Lesesirkelen vår fungerar så langt veldig bra. Vertinna viser fram to bøker, og vi stemmer på den vi vil lese. Forrige bok var det eg som fann fram, vi las "Fredagsstrikkeklubben" av Kate Jacobs. Ei utruleg koseleg bok med mykje meir innhald enn forventa. Stilen var nok veldig amerikansk, men det likar eg eigentleg ganske godt. Boka er lettlest og underhaldande, og hentar fram både latter og nokre tårer. Eg har høyrt rykte om både ein oppfølgjar og at boka er filmatisert. Verdt å sjekke ut!

På musikkfronten er det mykje som skjer for tida. Volda mannskor er i full sving med å øve til ein stemningskonsert i Sæbø kyrkje fredag 11.12.09. Sjå meir info i Møre/Møre Nytt når det nærmar seg. Verdt å få med seg!!
Åmdalskoret berre damer øver på ein ny kabaret vi lagar, med premiere 6. mars på Ørsta kulturhus. Spennande spennande... :-)
Sjølv så har eg hatt få solistoppdrag denne hausten, det vart eit bryllaup i oktober og elles ikkje noko.
Eg har ikkje hatt så god tid rett og slett, men håpar heller på fleire oppdrag til våren. Det er så utruleg kjekt å synge!! (eg skal vere litt solist attmed begge kora mine framover, og det ser eg absolutt fram til...)

Elles så vil eg berre minne deg på mi fine heimeside: http://www.jannesang.no/

Fin tur i Røros

2009-08-02T16:55:00.004+02:00

Denne helga har Even og eg vore på tur i Røros-området, og her er det veldig fint! Vi sykla eit par mil, gjekk litt i skogen og fekk tatt mange fine bilete.

Mi nye heimeside

2009-07-09T21:42:00.002+02:00

Eg har no endeleg fått meg ei "skikkelig" heimeside, der det er meg som musikklærar/songar som vert presentert. (eg skal ikkje slutte å blogge...) På sida mi får ein info om songundervisning og litt om min bakgrunn, og eg håpar at sida vil fungere som inspirator for songfuglar som har lyst til å ha meg som lærar. I tillegg ynskjer eg å få fram at eg underviser nybegynnarar på piano.

Så om du kjenner nokon som har lyst til å ta timar i song eller piano, så gir eg deg fritt løyve til å gi vekk webadressa mi! :-)

www.jannesang.no

På heimesida mi er der eit kontaktskjema ein kan fylle ut, og når ein trykker på "send"-knappen havnar meldinga rett mi innboks.

No når eg førebels er ferdigutdanna ynskjer eg å arbeide meir med musikk framover. Det er veldig kjekt og givande, for ikkje å snakke om variert. Til hausten skal eg fortsette å dirigere Åmdalskoret Berre Damer og Volda mannskor, og det gler eg meg til med stor entusiasme!
Vi har spennande prosjekt på gang i begge kora, og om du har lyst å vere med så har vi nokre ledige plassar i kvart kor. Kontakt meg om du er interessert.

Elles så seier eg berre god sommar!

Herlig med sommarvêr!

2009-05-31T23:11:00.004+02:00

Før vi la oss i går bestemte vi oss for å gå ein tur i dag, og før vi stod opp i dag så vart vi einige om at Niven vart destinasjonen! Og for eit flott turvêr! Vi køyrde bort i Nordalen og fekk med oss svigermor, svigerfar, Per Bjarne og hunden Kaisa, og vi var på tur i ca 3 timar.

Etter turen vart det grilling i Nordalen med heile Volda-gjengen.

Slike dagar vil vi ha fleire av! :-)

Lost in the Stars

2009-05-11T18:13:00.002+02:00

Det har vore lite tid til blogging i det siste, men no ser eg snart enden på 4 års studiar ved Høgskulen i Volda. Torsdag held eg ein konsert på Rokken i Volda, som er ein såkalla bachelorkonserten eller eksamenskonsert. Konserten, som har fått tittelen "Lost in the Stars", er ein presentasjon av eindel av Kurt Weill sitt amerikanske materiale. Han komponerte for film og scene, og der er mange flotte perler å ta av.

Eg seier berre hjarteleg velkomen til konsert, og håper at akkurat DU har høve til å ta deg ein tur!

"Lost in the Stars"
Stad: Rokken
Når: Torsdag 14.05.09 kl. 19.00.
Pris: 50 kr

Fin musikk...

2009-04-16T21:06:00.004+02:00

Eg har høyrt mykje på musikk for tida, meir enn vanleg. Ipoden er fullasta med alt ifrå Ella Fitzgerald til Bobby McFerrin, Arvo Pärt og Stevie Wonder. For meg handlar musikk mykje om stemning, men også eindel om jobb. Flaks at eg har ein så kjekk jobb då, ikkje sant? Men ein ting er sikkert, det er viktig for meg å lytte til rett musikk til rett tid. Det er ikkje kvar dag eg er i humør til vokalprestasjonar a la Bobby McFerrin, sjølv om han er sjølvaste KONGEN innan vokalmusikk.

I det siste har eg jobba med å få ferdig bacheloroppgåva mi, og då er det fint å ha noko på øyret for å "hermetisere" konsentrasjonen. Eg har sjølvsagt (det er eksamensrepertoaret mitt) lytta mest til Kurt Weill-musikk, kanskje snik det seg inn nokre songtekster på denne måten? Mange klarer ikkje å jobbe med skulearbeid eller anna konsentrert arbeid og lytte til musikk samstundes. Eg vert mykje meir distrahert av alle lydane rundt meg enn av musikk, men KVA eg høyrer på er vesentleg. Det må vere musikk eg har høyrt så mange gongar at eg ikkje vert sitjande med høg puls og lett, raude kinn over å høyre eit fantastisk bra arrangement eller ei stemme som gir livet meining... (jada, overdriv med måte...) Så eigentleg kan eg ikkje sei at eg lyttar til musikk når eg skriv, men den er der.... alltid!

Øving med bandet...

2009-04-04T23:28:00.004+02:00

Denne vinteren og våren jobbar eg sakte men sikkert mot eit mål, bachelorkonsert 14. mai.

Det er krevjande og spennande, i tillegg til konsert skal eg levere ei lita skriftleg oppgåve som skal "stå i stil" med konserten. Med litt for lite energi går det skriftlege veldig seint. Men eg er optimistisk med tanke på å skulle synge musikk av Kurt Weill på Rokken scene. Bandet mitt er heilt supert, makan til dyktige musikarar skal ein leite lenge etter! Tålmodige sjeler som let meg kommandere i hytt og pine, forklare musikalske idear med nye ord eg finn på sjølv etterkvart...

Takk for at de stiller opp, karar! :-)

Piano : Helge Berg

Bass : Øystein Eckhoff Holsvik

Trommer : Øystein Skattebu

sjeldent for tida....

2009-03-30T22:07:00.003+02:00

...at eg er inne på bloggen min og andre sine... Eg har hatt nokre dagar der datamaskina mi ikkje har vore så attraktiv som sofaen, og å sitte med dataen på fanget likar eg absolutt ikkje!

Viruset heng framleis i kroppen, og eg er slapp og sløv mesteparten av dagane. Men i dag har eg kjent meg litt betre, så kanskje eg held på å friskne heilt til igjen?

Her er eit foto Even har teke frå altanen vår ein haustdag i 2007. Er ikkje det fint vel?

Den vesle streken oppe i venstre hjørne kom då eg skulle skrive namnet hans på biletet, ikkje heilt elegant... Men det ser betre ut i opprinneleg størrelse. Eg har funne ut at eg treng noko fancy programvare, for fotoredigering er ikkje artig i paint.

Elles så har eg ikkje fått med meg at nabodama Olaug (bloggar hennar heiter Besta) har feira dag før eg las bloggen i kveld...

Betre seint enn aldri - gratulerer! (Eg såg alle bilane...)

Litt av kvart...

2009-03-19T19:03:00.010+01:00

No er det ei stund sidan eg har blogga, eg har rett og slett ikkje hatt overskudd til det. Eg er framleis sjukmeld, og er stort sett slapp og trøytt. Men no i helga var der litt ekstra aktivitet likevel! Først ut var Volda mannskor, som reiste til Austefjorden og deltok på korpset der sin musikk-kafe. Det var veldig koseleg! Alle bør få med seg ein slik kafe i ny og ne, der bygdefolket er samla og ein får høyre det lokale musikkliv i aksjon. Mannskoret likte seg godt, og eg var veldig fornøgd med prestasjonane deira også.

Laurdagen gjorde eg omtrent ikkje anna enn å sove, men søndagen braka det laust igjen!

Søndagen var via til Åmdalskoret berre damer, som arrangerte sin versjon av ein korkafe - Herskapeleg festkonsert på samfunnshuset i Follestaddalen. Og det var kjekt... (For dei som les Møre Nytt så er det nok allment kjent at ordet eg nyttar mest i intervju-samanheng er "kjekt".... i alle fall når journalisten ringer og vekker meg før 12 når eg har fri og søv som ein stein) Elles så vil eg uansett få presisere her at eg kan andre ord som skildrar korleis "livet som dirigent" i dette damekoret er: utfordrande, inspirerande, spennande, interessant, koseleg, vanskeleg, enkelt, artig, rørande, lærerikt, flott, overraskande, krevjande og fantastisk! (med meir)

****

Herskapeleg festkonsert
er eit konsept som desse damene har utvikla over tid. Damene stiller opp i flotte kjolar og høg juggelfaktor, med flotte songar og artig program. I tillegg vert det servert gode kaker og kaffi i fint, herskapeleg servise - som damene tek med heimafrå. Vi har med servitørar/servitriser rekruttert frå familie og omgangskrets. Salen er pynta til trengsel, og det er roser og høge lys på alle bord. Scena er som ei herskapeleg stove, og vi er så godt vertskap som vi berre greier!

Denne gongen, som forrige gong, vart det fullt hus og god stemning. Vi fekk mange gode tilbakemeldingar, og det set vi pris på! Både Møre og Møre Nytt skreiv rosande ord, og det har ført til at eg har blitt oppringt av folk som ynskjer å leige koret til underhaldning.

Supert! :-)

Marit syng "En liten pike i lave sko", bak ho frå venstre ser vi Linda, Eli og Hadla.

Eg har ikkje så mange bileter frå søndagen, for plutseleg vart batteriet tomt... Even lovar å lade opp meir neste gong! (Det er forresten han som er fotografen her!)

****

***

Elles så har eg vore litt husleg, som ei motvekt til alt musikkrelatert. Eg har alltid likt å safte og sylte, og noko eg alltid har hatt lyst å prøve på den fronten er å lage appelsinmarmelade.

For eit fantastisk flott ord! Ikkje sant?

Så i det neste blogginnlegget skal eg skrive om syltinga!

Seinare kjem det og litt om bachelorøvinga mi, for no har eg så smått starta...

Ein torsdagskveld

2009-03-13T00:06:00.004+01:00

Det er torsdag, eg er sjukmeld og lei av det. Rambo derimot (hunden vår) er veldig glad for at eg er heime så mykje... Det er eit virus i kroppen min, seier doktoren, og det krev at eg tek det med ro. Eg gjer så godt eg kan, men trass i at eg kjenner meg slapp og sliten så er det altfor kjedeleg å slappe av. Nokre aktivitetar er det umuleg å kutte ut, så på søndag vert det ein spennande dag. Åmdalskoret berre damer arrangerar "Herskapeleg festkonsert" på samfunnshuset i Follestaddalen, og det er litt av eit arrangement! Salen og damene vert pynta til trengsel, og så byr vi på fin musikk, lun humor og gode kaker.

Elles er det kvile som gjeld, og då nyttar eg tida til å sove, lese, strikke og sjå på tv. Slikt er det vanlegvis lite tid til elles, så på ein måte er det no kjekt også. Men.... Det nærmar seg mai og bacheloreksamen også, så eg jobbar litt med låtane eg skal bruke på konserten. Kurt Weill-musikken er veldig fin, men ganske vanskeleg. Men eg angrar ikkje på temaet, dette er ein fin måte å lære seg noko nytt på - eksamen høver bra som motivasjon!

Mine kjære er flinke til å ordne opp, spesielt no når eg skal slappe av litt ekstra. I dag fekk eg servert nydeleg middag som dei to hadde laga ilag, kyllingfilet med ris, pepparsaus og salat. Even krydra kyllingen med bl.a kanel, og det smakte veldig godt! Han kalla retten "Cinnamon-kylling a la svigermor" - og det ligg ei intern melding til mamma i den tittelen... hehe:-)

Her er eit bilete frå ein gong Even laga sine berømte (her i huset) ostesmørbrød til kveldsmat.

Eg brukar litt tid på å lese andre sine bloggar for tida, og det er veldig triveleg å fylgje med på kva venner, familie og naboar driv med! Så det har ikkje vore heilt bortkasta å vere sjukmeld, bloggverda mi har i allefall vorte utvida.

Konkurranse på blogg

2009-03-08T22:29:00.002+01:00

Såg eit tips om ei konkurranse på ein blogg på bloggen til Elisabeth.
Fin premie, så eg melde meg sjølvsagt på!
Vil du vere med på konkurransa kan du gå til http://lindabelin.blogspot.com/2009/03/mars-konkurranse.html

I same sleng fann eg ein stilig nettbutikk, www.belin.no
Trur det vert litt handel frå den sida ja, veldig mykje spennande.

Helg og Eiksundsamklang

2009-03-07T23:41:00.004+01:00

Fredagen vart ein roleg dag, med litt huslege syslar og eit koseleg besøk om kvelden.

Elisabeth og Frank var her, og vi åt taco og Stian sine heimebakte Brownies. (Ikkje Toro!)

Ein triveleg kveld med god prat, tv-sjåing innimellom og litt strikking... Kvar gong vi har besøk, eller er på besøk, så tenkjer eg at dette må vi gjere oftare. Det er no så kjekt!

Eg mistenker at det "før i tida" (ikkje heilt spesifisert...) var meir vanleg å ha besøk på det jamne. Eller er det berre vi som er asosiale?

************************************

Volda mannskor deltek på Eiksundsamklangen, som er ein samarbeidskonsert med kor frå heile distriktet som er rundt Eiksundsambandet. Tenk, det har allereie gått 1 år sidan tunnellen kom! Utruleg... Det ser ut til at dette konsertopplegget skal bli ein årleg tradisjon. Øyvind Holsvik, som syng i Volda mannskor, er ein av initiativtakarane og organisatorane. Det er Svein Eiksund som er dirigent for felleskoret, og så stiller kvart kor med ein eigen song.

I kveld har vi vore i Herøy kyrkje, og det vart ganske fullt med publikum der. Volda mannskor song "Mitt land"(tekst av Anders Hovden), og eg trur det gjekk ganske bra. Dessverre er det litt trongt når så mange kor er innvolvert, og det resulterte i at eg sto veldig nært koret då eg dirigerte. Dermed høyrde eg ikkje så godt korleis dei song, og eg fekk eit inntrykk av at det var lite homogent og slitent i klangen. Men eg fekk tilbakemeldingar som tyder på at det let bedre for dei som ikkje var så nær, så eg vel å tru at vi klarte oss fint.

Eg fekk vere publikum på resten av konserten, og det var mykje fint å høyre. For det meste musikk med lokal tilknytning, og her er mange songskattar frå dette store distriktet.

Kameraet mitt er ikkje så bra på avstandsfoto, så eg tok ingen bilete av kora som var med. Men før konserten knipsa eg litt rundt meg!

Her er nokre bilete av gjengen før konserten starta... :-) Kjekke karar!

Etter konserten gjekk vi ned til kulturhuset, der det var korfest med mat, underhalding og etterkvart dans. Eg reiste heim litt tidleg, for eg treng å ta det med ro. Men eg fekk med meg eindel morosam underhaldning...

Øyvind Holsvik fekk blomar for innsatsen sin, men jammen ga han dei vidare til meg!

Eg var heilt paff, sjå fine buketten!

I morgon, søndag, er det konsert i Volda kyrkje. Det blir spennande å sjå om der vert like mykje publikum som i fjor!

Mmm, cake!

2009-03-05T14:36:00.004+01:00

Av og til får eg så stor trang til å bake noko. Det fekk eg i dag. Utfordringa då er å lage noko av det eg har i hus, og så gjerne finne på ein liten vri sjølv. Oppskrifta eg brukte i dag fann eg i ei kokebok som heiter Diabeteskokeboka : Gourmetmat med lite sukker og fett. (Utgitt på Damm forlag) Glasuren fann eg på sjølv, då eg syntest den som stod i boka såg kjedeleg ut.

Sidan det er sol og vårleg ute, så ville eg lage ei appelsinkake.

Oppskrifta...

Appelsinkake med mandlar

180 g margarin (eg brukte Tine smør)

75 g sukker (eg brukte sukralose)

3 egg, samanvispa

150 g sikta kveitemjøl

1 ts bakepulver

75 g malte mandlar

saft og rive skal av 1 appelsin

nokre dråpar mandelessens (eg brukte 5 dropar, det var kanskje litt lite)

*******************************

Glasur: (Smeltast og kokast nokre minutt)

50 g smør

0,5 dl sukker

saft frå ei halv appelsin

2 dl kokosmasse

******************************************

Ovn: 160 grader

Form : Eg brukte ei tupperware silikonform, det står i oppskrifta at forma skal vere djup og ha eit tverrmål på 20 cm. Smør forma...

Steik kaka i 50-60 minutt, skal verte gyllen og fast å ta på.

Avkjøl på rist, står det, men eg lot mi kake få vere i forma til ho var lunken.

Av instruksjonar elles så står det berre at ein skal blande alle ingrediensane... Det eg gjorde var å smelte smøret medan eg vispa saman egg og sukker. Så blanda eg bakepulveret i mjølet. Eg veit ikkje om det er eit poeng, men eg brukar å kjøle av smøret litt før eg tilsett det, og så tilsett eg alltid den kaldaste væska først.

Kaka vart saftig og god, og glasuren (eller fyllet om du vil) passa kjempegodt til kaka. NAM NAM! (Ja, eg har sjølvsagt prøvesmakt eit lite stykke, kan no ikkje servere noko eg ikkje veit korleis smakar! )

Lettvint og godt! Eg trur Stian og Even vert positivt overraska når dei kjem heim, det er nemlig ikkje kvardagskost med kaker her i familien... (Ikkje eingong i helga...)

Home is where the heart is

2009-03-05T00:21:00.003+01:00

I kveld har eg slappa godt av i sofaen, med TV2 og TVN som gode underhaldarar. Er nok litt hekta på Brothers & Sisters og Lost, sjølv om sistnemnde eigentleg har utvikla seg litt sært. Familielivet i Brothers & Sisters er temmeleg amerikansk og overdrive på mange måtar, men eg kan ikkje anna enn la meg begeistre. Jaja, så er eg vel litt ukritisk... Men det er avslappande og fint å vere akkurat det!

Jammen er det godt å vere heime litt, utan å ha dårleg samvet for alt ein skulle ha gjort. I dag har eg gjort akkurat nok! Eg trur at eg har for vane å ta eit overblikk over alt folk rundt meg får gjort, og så tenkjer eg at i samanlikning så kjem eg veldig dårleg ut. Ikkje er eg spesielt flink til å ta kontakt med vener for å finne på noko, ikkje held eg huset plettfritt til ei kvar tid, ikkje har eg full kontroll i jobbsamanheng og ikkje er eg flink til å ta vare på meg sjølv. (Og her kan eg nok ramse opp mange punkt...men har ikkje planar om å verke sjølvmedlidande, for det er ikkje det dette handlar om.) Poenget mitt er at det eg ser og oppfattar rundt meg er summen av det andre gjer og får til. Og så på eit eller anna vis innbiller eg meg at eg burde vere flink til alt dette. Er det slik det skal vere? Må alle klare alt?

Akkurat no er det fint å ta seg tid til å tenke over saker og ting, for som regel hastar eg frå det eine til det andre. Då vert det ikkje alltid tid til refleksjon...

Tysdagsblogging natt til onsdag

2009-03-04T00:16:00.004+01:00

Eg trur ikkje det er så mange som les bloggen min, og utfordringa eg kom med er ubesvart så langt. Jaja, det var no eit forsøk i alle fall! Skal halde meg til "vanleg" blogging ei stund, sidan det er ganske kjekt å skrive litt i ny og ne.

I kveld har eg vore på ei lita korøving med Åmdalskoret berre damer. Eg er sjukmeldt for tida, så energien er så som så. Men vi måtte ha øving uansett, for det nærmar seg "Herskapeleg festkonsert". Vi fekk øvd eindel, men avslutta tidleg. No får eg håpe at eg vert heilt frisk snart, det er kjedeleg å hangle slik eg har gjort denne vinteren.

Elles så har eg strikka eindel i det siste. Tøflepar til mamma, Even og snart til Stian er det eg har halde på med dei siste dagane. Før det laga eg ei pute i svart og lilla. Å strikke er fin avslapping, det gir god avkobling frå alt som kan likne stress. Men eg er ikkje så flink, det vert med enkle oppskrifter!

Eg les litt for tida også... Det vert nok litt litteraturomtalar her i bloggen min snart, men ikkje no!

Det er visst litt seint, så då seier eg god natt! :-)

Ei utfordring?

2009-03-02T15:23:00.007+01:00

Eg har surfa litt rundt på bloggar her og der, og mange driv på med ulike utfordringar til tema å blogge om. Elisabeth utfordra meg til å knipse litt kjøkkenutstyr, så då tenkte eg at eg kan finne på noko lurt eg også! ;-)

Sidan det er musikk som på ein måte opptek meg mest, så må utfordringa bli noko innan det temaet. Hmm... Då eg gjekk på Fagerlia for nokre få (!) år sidan, så var eg ein del av ein typisk "Tuppen og Lillemor"-duo. Mi beste venninne heitte då Marit, og vi hadde eit sterkt behov for å kommunisere heile tida. Tema? Vel... ganske variert. Men i timane med bl.a geografi og fransk kunne vi ikkje akkurat prate så mykje, så det gjekk i lappar. Eller rettare sagt notatbøker. Men no kjem eg snart til det som har med utfordringa å gjere! All skriftleg kommunikasjon gjekk føre seg i form av songtitlar eller linjer frå songar, og det kunne f.eks sjå slik ut:

J: Wake me up before you go-go

M: Should I stay or should I go?

J: I will survive...

M: Life goes on...

For oss var dette reine kodespråket, for om denne boka kom i hendene på feil person så meinte vi at det var så internt at det ikkje kunne avsløre noko... Vel...

Så kjem utfordringa:

Ta bilete og gi dei tittel frå ein song.

Eg utfordrar Elisabeth, Linda og Besta (Olaug) !

Her kjem min variant:

"Man of Constant Sorrow"

- frå filmen O Brother, Where Art Thou?

Artig song eg alltid vert glad av å høyre. Foto: gitaren som faren min hadde i sine unge år.

*****

"Speak low"

- av Kurt Weill, mange artistar har gitt ut denne.

Sjå kor inderleg denne syngedama formidlar, slik teksta i melodien fortener. Speak low when you speak love!

****

Til slutt:

"Baby elephant walk" (Mancini, trur eg)

Eg har litt sansen for elefantar, spesielt den sorten ein kan ha i stova si!

****

Så då gjenstår det å sjå om de fell for utfordringa mi!

:-)

Akvarium!

2009-03-02T00:38:00.001+01:00

Fisk

2009-03-02T00:31:00.002+01:00

Fekk så lyst på eit akvarium... Det hadde vi då eg var lita... Hmm...

Kjøkkenbloggar

2009-03-01T21:50:00.005+01:00

Jaudå, no har eg altså vore å blitsa litt inne på kjøkkenet... Naboane trur vel eg har vorte endå galnare... Det vart eindel foto, ikkje alle like vellukka. Så her er ein liten blogg frå mitt vesle kjøkken!

Eg startar med denne Bake-it-easy-forma som vi fekk oss i 2005, kjøpt for gåvekort vi fekk i bryllaupspresang. Denne er veldig praktisk for dei som er glad i heimelaga iskake! Samme forma kan både i frysar og ovn - med fatet på - og det høyrer med eit laust lok også. Praktisk at ein ikkje må flytte kaka over frå form til kakefat, i alle fall for meg og mine 10 tommeltottar...

Vidare ser vi her eit lite utval av te-stæsj. Eg er heftig begeistra for god te - og har akkurat lært meg å like best å ikkje tilsette noko søtt. Så då må eg vel seiast å vere ein vidarekomen tedrikkar? :-) For at teen eg kjøper i lausvekt skal halde seg god lengst muleg, lagrar eg den i glas med tett lok. Eg likar å ha eindel sortar å variere mellom, og desse søte sylteglasa høver perfekt som oppbevaringsglas.

Om eg kan å koke egg? Nei. Men denne duppedingsen gjer meg i stand til å late som om eg kan det - egga vert perfekt kokte kvar gong! Eg rett og slett puttar denne oppi attmed egga, og så endrar denne farge etter kor kokte egga då vert etterkvart... Smart!

Til slutt i denne kjøkkenmontasjen viser eg her litt Tupperware. Eg har to skap fulle av den plastikken, og eg er veldig glad i kvart einaste produkt av det merket eg har. Her ser vi noko eg brukar til å smelte smør i microen i, heilt skvettefritt! (Der er no lok... ) Når eg lagar konfekt (har gjort det minst 2 gongar i mitt liv), så smeltar eg sjokoladen i denne. Til slutt bør eg vel innrømme at akkurat denne Tupperware-dingsen tilhøyrer mamma, men sidan ho for tida er på Kypros så...

Då har eg tatt utfordringa, Elisabeth! No kjem det snart ei utfordring til deg!

Flittig bloggar?

2009-03-01T20:11:00.003+01:00

Jammen er eg flittig til å blogge... Med denne intensitiviteten er det rart om mine blogg-lesarar rekk å få med seg andre sine bloggar, så mykje som her er å lese...

Vel vel... ein får skulde på tidsklemma, eg har høyrt at det er trenden for tida.

Ei av mine kjære svigerinner, Elisabeth, har også (!) fått bloggedilla. I Elisabeths verden får ein lese om det som opptek ho for tida, og det er litt av kvart har eg funne ut!

I dag oppdaga eg at ho for nokre innlegg sidan har lagt ut foto av kjøkkenutstyr, og faktisk sendt den utfordringa vidare til blant andre meg... så mitt neste innlegg vert frå mi husmoderlege (finst det ordet??) side. Trur eg.

I kveld skal eg kose meg med familien, vi skal sjå Himmelblå på NRK1. Triveleg serie!

Tidlegare i dag var vi på besøk hos svigermor - vi fekk ball til middag! Fantastisk godt!

Elles så legg eg inn eit bilete av ei stilig plante dei har i Loro Park på Tenerife. Eg har lyst på ei slik plante...

...og det får bli alt for no...

Det er (snart) jul

2008-12-21T01:52:00.004+01:00

I skrivande stund sit eg i godstolen og slappar av etter ein innhaldsrik dag som vertinne for mamma si store feiring. Ho vert 70 år den 23., så då fann Even og eg ut at vi ville halde ope hus her og invitere mange... Det gjekk fint, med litt ommøblering og logistikk på førehand så fekk vi plass til 35 gjestar i løpet av dagen. Jammen var det kjekt også! Eg likar godt å halde selskap, og kosar meg når eg får anledning til å bruke av alt som er i skuffer og skap. (så står det der ikkje fånyttes!)

Som surprice hadde eg avtalt med Volda mannskor at dei skulle stikke innom og synge litt, og dei kom hit blide og kjekke og klarte å sjarmere mamsen i senk! Ho vart kjempeglad og veldig overraska.

No er det snart jul, og eg kjenner at det skal bli godt med nokre dagar fri. I år feirar vi jul i Volda, med svigers. Julafta skal eg på "institusjonsturne" med Volda mannskor, vi skal opptre bl.a på omsorgssenteret og sjukehuset.

No er eg så trøtt at dette innlegget truleg vert både utan samanheng og struktur, så det vert natti natti ganske straks!

*tudelu*

Ut på tur...igjen...

2008-08-24T20:56:00.006+02:00

Blide turgåarar!

På veg opp fann vi denne idylliske plassen...

Rambo og Even slappar av.

Dette vert meir og meir likt ein "skryteblogg"... Prega av å vere ikkje så reint lite stolt av seg sjølv, er det lett å la seg rive med... Og eg fornektar meg altså ikkje.

I dag gjekk turen til Vallasetra, med oppstart frå heimen. Det er altså ei seter som ligg i gangavstand frå oss, vi går fram i Nupen og vidare opp på setra derifrå. Som sist helg var veret perfekt, og vi fekk ta mange fine bilete. Det var ikkje akkurat ein fjelltur, men kroppen vart både svett og sliten - så det gjer vel omtrent same nytta!

Vallasetra er eit populært turmål, vi møtte mange turgåarar, syklistar, joggarar og bilar. No er det eindel år sidan sist eg gjekk til denne setra, og eg må seie at det var mykje trivelegare å gå dit før då det var færre bilar å passe seg for. Men vi hadde det kjekt, trass i at kanelbollane eg bakte til turen låg igjen heime i frysaren... (dei var gode å ha etter turen også)

Neste helg vert det nok ingen tur, for vi skal i bryllaup. Men vi håpar på ein fin haust og fleire høve til kjekke turar.

Fjelltur

2008-08-17T23:26:00.010+02:00

Bileta er :
1. Utsikt til Folkestad
2. Stian, Rambo og eg med Ørsta i bakgrunnen
3. Even gir Rambo hundegodt og vatn
4. Steinen til kong Ring.
5. Vallabøen, der huset vårt er.
(dei gule tala på bileta er feil dato-innstillingar på Stian sitt kamera)

No har underet skjedd, eg har vore på fjelltur! Og eg kom meg heilt opp på toppen, Niven nærare bestemt. (Ja, eg veit at det ikkje akkurat er den høgste toppen i distriktet...)

Vi var 4 stk som la ut på tur, Stian, Even, Rambo og eg. Perfekt ver med fin temperatur. Det er lenge sidan sist eg var på fjelltur, dersom ein ikkje reknar med ein liten tur eg gjekk i Geiranger i vår. Derfor var eg spent på forma, og rekna med å måtte snu omtrent halvegs. Med Even som primus motor fjellgeit, og Stian og Rambo som fortropp, heldt motet seg ganske bra heilt til siste kneika. Då eg såg siste bratte metrane føre meg var eg heilt overtydd om at utsikta til Lauvstad var fantastisk nok, Ørsta har eg no sett frå fjell før. Men gutane mine ville ikkje la meg vere igjen, så med lovnad om endå betre samvet - og ei boks med kald pepsi max, fekk dei meg med siste stykket - opp til der kong Ring sin stein er.

Forteljinga om kong Ring, som levde for lenge, lenge sidan, er at han sette seg på den steinen som står på Niven og skua utover riket sitt. Det spørs om han vart sitjande ei god stund, for der er merke etter ein bakende på steinen den dag i dag.

Boksa med brus var kjærkomen, og det var også dei heimebakte kanelbollane vi hadde med som niste. Rambo fekk hundesnop og vatn, men var meir interessert i å sjå på utsikta enn å ete. Etter ei lita stund kom fleire turgåarar, deriblant ein nydelig schäfer. Rambo var skeptisk, men roa seg fort.

Heimturen vart trigga av ei hyggeleg tekstmelding frå Linda, ei av svigerinnene mine i Volda. Ho inviterte på vaflar! Då vi kom ned, skjelvande i både anklar og lår, var det ikkje "berre" vaflar ho baud på. Jammen hadde ho vore avstad å kjøpt pizza også. Vi slo oss ned på plenen i Nordalen, det var veldig triveleg! Sjølvsagt var eg så sliten at eg sovna då eg la meg i graset under epletreet. Makan til dag!

Stian likte seg godt på turen, han seier at vi må fare på fjelltur neste helg også. Og kven veit, kanskje gjer vi det.

Sommarblogg

2008-08-06T23:07:00.006+02:00

Dette ser ut til å verte sjeldne innslag, men det får så vere. I dag vil eg blogge litt om ei fantastisk veke eg akkurat har hatt!
Forige veke var eg på Toneheim folkehøgskule, på årets sommarkorskule. Det er ei kursveke som gir tilbod om dirigentopplæring på fleire nivå, og korsongar- eller vokalgruppekurs for songarar. Eg deltok i ei gruppe for rytmisk musikk, med den danske kor-guruen Jens Johansen som instruktør.
Rytmisk musikk i kor vert stadig meir populært, og kompetansen på det feltet er på veg opp her i landet. Noreg ligg litt etter t.d. Danmark når det gjeld rytmisk kor, men no er vi stadig fleire som kursar oss i denne vide sjangeren. Musikken vi jobba med denne gongen var blant anna Stevie Wonder-melodien "As", som lenge har vore ein av mine favorittlåter! (Ja, Even og eg skal på Stevie Wonder-konserten på Hamar i september!!!) Elles var vi innom "Freedom", "Still crazy after all these years", "Bridge over troubled water"...mfl. Alle i kule arrangement, litt meir funky enn "normalt".

Det er mange vokalgrupper og kor som har gitt ut cd. Her er nokre få av mine favorittar:

Vox North (frå Danmark)

Vocal Line (frå Danmark)

Pitsj (frå Noreg)

Pust (frå Noreg)

Eg har delteke på fleire rytmiske kurs tidlegare, og som alltid lærer ein mykje meir enn "berre" dei låtane ein jobbar med. No har eg fått mange gode tips for ein vellukka kor-haust med både Åmdalskoret Berre Damer og Volda Mannskor, som er dei to kora eg skal dirigere til hausten.

Sjekk denne nettsida http://kor.no/index.cfm?cmd=nyheter&artid=1166 for meir info om sommarkorskulen! Kanskje du blir med neste år? (Det er i veke 30...)

PS! Det passar for alle som likar å synge i kor samt dei som er/vil bli kordirigent.

Og så litt litteraturformidling på tampen... :-)

Eg har nettopp lese boka "Havets katedral" av Falcones. Handlinga er frå Barcelona på starten av 1300-talet, og det er ein såkalla historisk roman. Skildringa av byen er levande fortalt, og historia er engasjerande og interessant. Sjølv om det er snakk om eindel sider å lese så går det rimeleg fort, boka har bra driv og er lettfordøyeleg. Vi får innblikk i klasseskille, politiske system og religiøse konflikter.

Der er blanda kritikkar for denne boka, men eg likte ho veldig godt. Ei anbefaling er dermed utsendt!

Framleis god sommar!

*Tudelu*

- and I quote: "Sometimes the clothes do not make the man!"

Frå "Freedom" (George Michael)

Beady Belle på Rokken

2008-02-19T22:37:00.004+01:00

Konsertmeldinga mi vart publisert i Møre Nytt 19.02.08.

Rokken Scene, fredag 15. februar 2008: Beady Belle. Jazzklubben.

Unik og spennande konsert

Fredagskvelden arrangerte Jazzklubben konsert med Beady Belle på Rokken Scene i Volda.
Det var ikkje utan forventingar eg møtte opp på konserten, som mange ørstingar og voldingar har venta på sidan sist Beady Belle var i Volda for to år sidan. Bassisten Marius Reksjø har i ulike samanhengar spelt ilag med Beate Slettevoll Lech sidan dei studerte musikk i Oslo, og Beady Belle er både Beate sitt artistnamn og namnet på duoen deira. Duo vart til trio då trommisen Erik Holm vart fast medlem i 2007, og i tillegg hadde dei med seg Jørn Øien på tangentar og Geir Sundstøl på gitar.

Bandet opna med den stemningsfulle låta Closer, henta frå albumet med same namn frå 2005. Beate si varme stemme skapte ei herleg atmosfære frå første låt. Med eit band samansett av interessante, dyktige musikarar omkransa ho publikum med ekte speleglede. Etter opningslåta uttalte Beate at ”i kveld skal vi kose oss”, og publikum var ikkje ueinige i det. Lydnivået var dempa og passa godt til framføringa.
Apron strings handla om ein lengsel, og gitaristen spelte med bottleneck og ga låta ein klar signatur. Den litt seige, tilbakelente grooven smelta saman tekst og musikk på ein naturleg, fin måte. Noko som kjenneteikna heile konserten er Beate si evne til å få fram teksta og innhaldet i songane, og tekstane er vel verdt å få med seg!
Beady Belle spelte både gammalt og nytt materiale, til stor glede for publikum. Eit av dei mange høgdepunkta var den nye låta Viscous ocean, som betyr seigtflytande, tjuktflytande hav. Den fengande og funky låta Irony, med eit utruleg tøft piano- og bassriff i starten, tok heilt av. Pianist og trommis leverte nokre soloparti av den sorten ein ynskjer aldri skal ta slutt.
Låta April fool var ei av dei låtane gitaristen utfalda seg på, og den litt melankolske, vare låta fekk eit ekstra løft av Geir Sundstøl sine fine gitartonar.
Mot slutten av konserten kom der ei låt der Beate tok heilt av med scat-synging og takløftande improvisasjon! Stemninga i salen var heilt intens!

Avslutningsnummeret deira var Moderation, ei stilig, funky låt. Men publikum ville ha meir. Beady Belle vart klappa inn på scena igjen, og spelte til pianisten Jørn Øien datt av stolen etter ein utruleg bra solo. Det såg ut til at det gjekk fint med han, og med latter og smil takka dei for seg og etterlot seg eit særdeles begeistra publikum.

Ein kan seie at musikken deira har element av Norah Jones, Stevie Wonder og kanskje til og med litt Nashville i seg, men uttrykket til Beady Belle er noko heilt eige. Dei er flinke til å variere dynamikken, det vekslar mellom det rolege, avdempa til trøkk som verkeleg går gjennom kroppen. Eg har vanskeleg for å plassere dei i nokon sjanger, der er element av blant anna jazz, funk og soul. Soundet vekslar mellom å ha eit akkustisk preg til å vere meir elektronisk. Vi får servert alt frå groovy funk til avslappingsmusikk, leikande og utfordrande med ei kjerne som er ekte og unik. Denne konsertopplevinga vil eg hugse, eg håper det ikkje vert lenge til neste gong!

Beady Belle:
Vokal – Beate Slettevoll Lech
Bass – Marius Reksjø
Trommer - Erik Holm
Piano – Jørn Øien
Gitar – Geir Sundstøl

SKAM på Rokken

2008-01-19T02:52:00.000+01:00

No har eg akkurat kome heim frå ein kveld på Rokken i Volda.
http://www.rokken.no/

Det var studentbandkveld, og det har eg faktisk aldri vore på før! Endeleg hadde eg fri og tid til å fare, og det var verdt det! Først spelte eit band eg ikkje hugsar namnet på, det var heilt ok. Men det som verkeleg var gøy var når SKAM kom på scena. For eit driv! For ein energi! Bandet var veldig speleglade, og fanga publikum frå første låt. Musikken dei spelar er som namnet tilseier Ska-musikk, med litt anna no og då. Alle nummera var fengande og godt framførte. Dei hadde med seg nokre gjesteartistar også, det var ein fin variasjon som fungerte bra.
Skal eg trekke fram ein melodi som favoritt må det bli "Free Nelson Mandela", som nok kan seiast å vere ein kjenningslåt for dette bandet. Det einaste eg sakna på den var litt meir fleirstemt koring, for det hadde gjort låta perfekt.
No er ikkje dette ei musikkmelding, berre ein liten rapport frå meg - kort og greitt...
Konklusjon: Gå på SKAM-konsert og opplev eit supert band med enorm utstråling og sjarm! (Dei spelar veldig bra også...)

Her er rom for ein liten bokprat også, aldri ein bloggpost frå meg utan det!
Nokre bøker eg har lest som er sjarmerande og fine er bøkene om Botswana sin første kvinnelege privatdetektiv. Ho og sekretæren (som var best i sitt kull på sekretærskulen) løyser små og store mysterium på uklanderleg vis, innimellom dei hjartevarmande koppane med Rooibos-te som vistnok hjelp for det meste. Den første boka heiter "Damenes detektivbyrå nr. 1", og det er til no omsett seks bøker i serien. Neste bok kjem på norsk i april 2008. Forfattaren heiter Alexander McCall Smith. Du kan lese meir om bøkene her:
http://www.haugenbok.no/resverk.cfm?st=free&q=damenes%20detektivbyr%E5&p=1&r=2&cid=155178

Bøkene er lettlest underhaldning ein lett vert glad i. Her finn du lun humor, fin moral og gode karakterskildringar. Bøkene bør lesast i rett rekkefylgje, då det er mykje av handlinga som er om hovudpersonane sine liv.

Trallala og hade bra!

*tudelu*

Oppturar og nedturar

2008-01-10T22:48:00.000+01:00

Kvifor er det slik at ein må oppleve nedturar for å verkeleg ha glede av oppturar? Det er ikkje noko som irriterar meg meir enn å feile. Eg likar rett og slett ikkje å gjere feil, ta feil, ha feil eller meine feil. Kort sagt... (!) Sjølvsagt har eg fått med meg at alle er i faresona for å (unnskyld uttrykket) drite seg loddrett ut i ny og ne, og då er det ikkje den meir frivillege klovnerolla ein av og til tek på seg eg tenkjer på.

Situasjonen er at eg i går skulle ha praksis som dirigent for skulekoret. Mine medstudentar skulle då, i fylgje vår eminente lærar (ikkje ironisk!), få bli dirigert av denne her studina som er så utruleg erfaren som kordirigent, og som har tatt masse kurs i det før dette studiet. Neida, ingen mangel på kompetanse, no problem! Etter ein slik introduksjon skulle ein vel kanskje tru at eg i det minste vart smigra, der eg gjekk mine modige steg fram til pianoet til jubel og applaus. Men denne dama vart ikkje det. For første gong i mitt liv fekk eg kjensla av at eg var i umiddelbar livsfare. Hjartet dunka som om det stod om lottomillionar, og alt av pigment i huda mi bestemte seg for å ta ferie. Så starta sirkuset. Makan til tragisk korøving har eg aldri opplevd, og det var min feil!

Oppgåva mi var å velge ut, presentere og øve inn ein funky låt i koret. Teksta måtte passe til kyrkjebruk, så eg fann fram ei mindre kjend gospellåt med bra groove. Med nyverva pianist som modig stilte opp sette vi igang, eg song og han spelte. Ingen hadde høyrt songen før, men musikkstudentane les notar og vart med etterkvart. Nervøsitet til trass, autopiloten min fungerte så langt. Så vart det havari. No survivors.

Eg vart blind og fekk ti tommeltottar då eg skulle spele stemmene for koret. Orda som stemma mi produserte var stort sett "skal vi prøve?", "trur dokke det går bra?", "ehh..." og "Okei...". Sjølv om eg stressa på var arbeidstempoet og instrueringstempoet så labert at etter kort tid hadde meir enn halve koret nærast innteke sovestilling. Eg skal vere glad dei ikkje gjekk i protest.

For ikkje å dvele med meir detaljar kan eg berre oppsummere hendinga med at eg hadde ein nedtur utan like, og eg likar det ikkje. Evalueringa frå læraren min etterpå var nyttig, men eg kjenner meg litt "snytt" for ei kjekk oppleving. Det handlar ikkje om prestisje, og eg meiner heller ikkje at eg er så veldig perfekt. Men at eg så totalt skulle feile på noko eg har drive med i snart 9,5 år - DET er heilt fantastisk irriterande. Men så var det det med oppturar og nedturar då... What goes up, must come down. Og eg har nok svevd på ei rosa sky etter fleire vellukka konsertar med kora eg vanlegvis dirigerar.

Kor er kjekt. Det skal det framleis vere.
Og no kan det berre bli betre! Neste gong, då klarer eg det!

Heilt på tampen eit tips i det litterære hjørne:

Ei nydeleg bok som eg anbefalar på det varmaste er "Bienes hemmelige liv" av Sue Monk Kidd. Boka var veldig i vinden då ho kom ut for eitt par år sidan og handlar om ungjenta Lily, som i heile oppveksten sin trur at ho har drept mor si. Handlinga er frå ein ferskenfarm i Sør-Carolina på 60-talet, der Lily veks opp med ein far ho ikkje klarer å kalle pappa, og med den svarte hushjelpa Rosaleen. Lily lengtar etter morskjærleik, og saman med Rosaleen legg ho ut på ei reise for å finne ut meir om mora si.

Romanen er munter i tonen, og likevel rørande og engasjerande. Ei bok det er lett å like!

That's it!

*tudelu*

Nytt år

2008-01-03T15:47:00.000+01:00

Kva er det eigentleg som er så spesielt med nyttår? Ein ny start, ein frisk start, eit betre liv, eit liv som i allefall skal vere litt sunnare, smartare og lettare enn fjoråret?

Det er mange år sidan eg slutta med det som så fint vert kalla nyttårsforsett. For eg har det no heilt fint eg! Eg veit at eg i somme periodar er flink til å leggje meg i rett tid slik at eg får nok søvn. Det hender eg lev sunt, faktisk er det regelen meir enn unntaket. Ambisjonar om å vere snill og grei har eg kvar dag. Det same gjeld for det å få gjort noko bra. Men nyttår, det er kjekt uansett. Sidan eg er student, så vert det automatisk ein ny start, eit nytt semester, nye fag og nye lærebøker. Derfor hadde det eigentleg passa godt om eg kunne krydre den automatisk nye starten min med litt ny innsatsvilje!

Sist men ikkje minst vil eg runde av med ei aldri så lita oppfordring på litteraturfronten. Likar du å lese krim kan eg på det varmaste tipse deg om Millennium-trilogien av Stieg Larsson. Best utbytte av bøkene får du om du les alle etter rad. Det startar med boka "Menn som hater kvinner". Nr. to er "Jenta som lekte med ilden" og den tredje er "Luftslottet som sprengtes".
Bøkene har bra driv, men dei er ganske "informative" i starten - hald ut! Det er verdt det!

Dett var dett for denne gong...
*tudelu*